لكى يا سيدتى
عمرك فى مره طلبتى من زوجك يشتريلك حاجات ولئيتيه مكشر كده ويقولك معنديش فلوس لكل ده والحاجات دى غاليه ..او كان دايما زهئان ومش طايق البيت ...او حاسه انه مش زى زمان..... اكيد بيحصل كتير.........لو دا حصل فاعلمى يا سيدتى ان دا لاانك مش بتقومى بواجباتك اللى فرضها الاسلام طبعا هتقولى لا انا بقوم بواجباتى كامله ,اه فعلا بس فيه واجبات تحسى ان هى بسيطه لكنها مؤثره جدا زى مثلا:-
-ان تكونى مبتسمه فى وجه زوجك مش زهقانه من شغل البيت والعيال حتى لو دا حصل ما تحسسيسهوش بكده لان هو ما لهوش ذنب فى كل ده كفايه عليه الشغل ومتاعب الشغل فأنت تخففى عليه المتاعب دى مش تزوديها.
_كمان مش هو يجى من بره يلاقيكى غرقانه فى المطبخ ونضافه البيت قال يعنى بتحافظى على نضافه البيت ما قلناش حاجه بس برده استعدى لرجوعه علشان يشوفك فى احسن حال بعد يوم شاق.
_وحاجه تانيه بتحصل كتير ما تعمليهاش مش اول مهو راجع تقابليه وتحكيله مشاكلك مع صحباتك وجيرانك او اى مشاكل هو ملوش دعوة بيها ولا حتى فى امكانه او من دخله ان هو يحلها.
وحاجه مهمه مهما حصل معاكى من مشاكل ما تدخليش حد من اصحابك او جيرانك بينكم لان دول بيعقدوا الامور مش بيحلوها .حاولوا تحلوا مشاكلكم بنفسكم واذا كان لابد من التدخل لو المشاكل كبرت يعنى يبئى دا بس من حق اهلك او اهله.
واهم حاجه انك تعامليه بما يرضى الله ...
وربنا يكرم جميع اخواتنا بالالتزام فى بيوتهم.
تم تناول الموضوع فى مجله التضان الاسلامى

اختار صح تعيش حياتك صح الصح
قال رسول الله صلى الله عليه وسلم:
ما استفاد المؤمن بعد تقوى الله عز وجل خير له من زوجه صالحه ان امرها اطاعته,ولن نظر اليها اسرته,وان اقسم عليها ابرته,وان غاب عنها حفظته فى نفسها وماله. صدق رسول الله صلى الله عليه وسلم.
وقال كمان عن ابى هريره رضى الله عنه (تنكح المرأه لاربع لمالها ولحسبها ولجمالها ولدينها فاظفر بذات الدين تربت يداك)
مسلم:1466/53
علشان ما تصادفش نوع من الزوجات تغلبك وتعذبك لازم تختار صح وفى الحديث الشريف اهم الصفات اللى بتميز الزوجه الصالحه وتأكد ان باتباعك لسنه النبى عليه الصلاه والسلام عمرك ما هتشتكى لان الزوجه الصالحه هتعاملك بما يرضى الله ومادامت عارفه ربنا يبئى عارفه ان ليك حقوق وعليها واجبات فرضها الدين لازم تأديها.
وزى ما قال" رسول الله صلى الله عليه وسلم "عن ابن عمر رضى الله عنهما (الدنيا متاع وخير متاع الدنيا المرأه الصالحه )
مسلم:1467/64
كده بئى ربنا هيكرمك انشاء الله .

النوع التانى بئى:-

نكديــــــــه

دى بئى معاها بيحصلك الاتى:

انت دلوقتى راجع من شغلك تعبان والساعه 2:30 الضهر يعنى لا لاقيها من الحر ولا المواصلات ولا الشغل المهم انت تدخل البيت

-السلام عليكم ........... هى طبعا من قبل ما ترد تبص فى ايديك على الشيله اللى انت جايبها قصدى اللى هى طلبتها منك وبتقولك

-ايه ده شكلك ماجبتش الكرونه -يااااه تسدقى فعلا نسيت

-طيب انا اطبخ ايه دلوقتى -خلاص يا ستى اعملى رز

-لا طبعا انت عايز تبوظلى الجدول بتاعى يالا انزل هات المكرونه

-برضه لا علشان انا لسه راجع تعبان ولا انت مش واخده بالك ولا انا اكون لسه جاى من النادى مثلا

-ماهو انت لازم تنزل والا مفيش غدا -طيب اريح شويه وبعدين اتنيل انزل

-اه على ما ارتحت يكون العشا جه ونتغدى احنا بئى فى العشا مش كده

-يووووووووووه خلاص نازل ارتحتى

........دا جزء من النكد غير طبعا الحوار بتاع الصبح ويالهوى بقى على النكد كده ع الصبحيه وياسلام كمان لما تعملك كده ليسته طلبات تصبح عليك بيها وانت دايما بتقولها:

-انا مش قلتلك مليون مره بلاش الطلبات اللى ع الصبح دى

-يعنى اقولك امتى وانت بترجع كل يوم متاخر

-هو انا يعنى بروح اسهر مش دا شغل ولا ايه دى مش عيشه دى

ويخرج برضه وهو زهقان طهقان مدايق

عارفين دى حلها ايه تعالى على نفسك ونفذ له كل طلباتها بهدوء كده ومن غير نرفزه وشوف هتعمل ايه وحياه ربنا هتدعيلى وجرب وقولى.

اكيد الكل مستغرب علشان انا فى المدونة دى مع الرجالة وضد الستات هى غريبة شوية بس دا والله من اللى بشوف الستات بيعملوه طبعا مش كلهم بس انواع معينة منهم واحدة واحدة كده حنقول الانواع دى اول نوع
رغااااااية
انت مثلا عمال تسمع الماتش و ابو تريكة ماشى بالكورة وصوت المعلق ارتفع وانفراد يا لا ياااااااااااه حظك وحش طلعت بره الملعب اوت وفى نفس الوقت الهجمة المرتدة عملها عمرو زكى يلا يا عمرو وها يا عمرو وفجأة وانت منسجم كدة مع الماتش تيجى (هى) تقولك
- عارف فلان بن فلان اشترى عربية وانت تقولها آه وطبعا مش معاها ..........تروح تسيبك هى ؟ لأ ..تخترع حكاية تانية تصرف بيها انتباهك ...
- شفت جارتنا عزيزة اطلقت امبارح---
-ياستى انا مالى ما تتطلق ولا تتنيل سيبينى اسمع الماتش---
-وبعدين كل شوية ماتش ماتش الواحد مش عارف يكلمك كلمتين على بعض علطول حاطت عينك فى التلفزيون
وطبعا تحصل خناقة طب ماهو كان قدامك طول اليوم ليه ماكلمتيهوش حبكت دلوقتى ويعينى لما يجى يروح القهوة تلاقى سيل من الزعيق والتحقيق
- بتروح القهوة تضيع فلوسنا كل يوم مالها الفرجة على التلفزيون 21 بوصة وملون كمان ولا انت غاوى القعاد على القهاوى علشان تتفرج على البنات
ممكن الحوار ينتهى على كدة او تستمر المدام وتقوله وهى معيطة طبعا انت مش فاضى تسمع لى كلمة ايه هو انا كنبة فى البيت آه ماانت عمرك ما حسستنى بقيمتى وتكبر الحوار والزوج المغلوب على امره طبعا كالعادة حيسيب البيت علشان يهدى اعصابه شويةهى الستات كدة مش عارفة ليه بتحب تكلمك وانت مشغول او بيتتفرج على حاجة عجباك بصراحة مش فاهمة السبب...... لو حد عارف يقوللى؟؟؟؟؟؟؟؟؟؟؟؟؟؟؟
بس يا ترى دى حلها ايه بيتهيئلى حلها انك تطفى التليفزيون وتسيب الماتس وتسمعلها!!!!!!!!!
لا عارفين بجد حلها ايه لما تكون هى بتسمع مسلسل الساعه 8 واكيد كل الستات بتحب المسلسلات تعالى انت واحكيلها على كل اللى حصل معاك فى شغلك النهارده ساعتها هتحس هى باللى بتعملو فيك ويااااارب تبطل تعمل كده
المره اللى جايه بئى هقولكم نوع تانى للستات